What is AC?

لو مستعجل، اقرا سيكشن "الحل".

لو شايف الفكرة هتفيد صحابك، متبخلش عليهم وشيره/ابعتهولهم.

لو انت مش طالب بس شايف انك Mentor وممكن تساعد الطلاب، تنورنا.

اثناء القراية، لو جالك سؤال فغالباً اتسأل قبل كدا ومتجاوب في سكشن "FAQs".

المشكلة

انت كطالب/كخريج مدرستش غير قشور ومصطلحات بسبب سوء التعليم في مصر (بشهادة دكاترة ومهندسيين مصريين خبرة) وبتحاول تشوف تعوض ده ازاي وبتلاقي خيارين قدامك، تدرس onsite او اونلاين مع نفسك. (شرح ده بالتفصيل في سكشن "FAQs" اخر نقطة) الناس اللي بتذاكر صح من MOOCs (مش مجرد فيديوهات) بتقابل مشكلة ان ساعات بيبقي عندهم سؤال، يقعدوا معاه بالأيام، ممكن حد يجاوبهوله في 5 د خاصة لو الموضوع Core Science زي Math او Algorithm؛ فبالتبعية، بعض الناس بتسيب الكورسات عشان محدش بيجاوبها.

وكنتيجة، الناس بتضطر:

1. يا اما تحضر كورس local مستواه متوسط او وحش ولكن هتلاقي اليجاوبك.
2. او تاخد كورس برا غالي عشان توفر الخدمة دي.
3. او متذاكرهاش اصلاً.

فليه ميبقاش في تجمع للبيذاكروا نفس المادة؟ مثلاً، انا بدرس Algorithms، ليه متفقش مع حد بيدرسها زيي ندرس منين ونساعد بعض الخ؟

الحقيقة، في حاجات متطبقة وناجحة؛ بس للأسف، معندهمش كل المواد وبالتبعية باخد وقت عشان اجاوب كل اسئلتي، فقلت اطبق نفس الفكرة.

الحل

1. عملنا ديسكورد سميناه AC (Active Courses) فيه شنلات لكل المواد عشان نتناقش ونسأل فيها. (فيه ~1800 طالب)
2. هيحاكي AC فوائد الجامعة (ويبقي احسن منها كمان) بحيث الطلاب يدرسوا مع بعض نفس الكورسات في نفس الوقت -لو أمكن- او يبقي في حد خد الكورس قبل كدا ويقدر يساعد عادي. (شرح الكلام بالتفصيل في سكشن "AC Vs Others")
3. هينتج عن ده عملية ارشاد متبادل ما بين الطلاب (Mutual Mentoring) ودي تعتبر اكبر ميزة في AC. (شرح كل الكلام بالتفصيل في سكشن "Mutual Mentoring")

طريقة دخول AC

How to join AC

AC Vs Others

نبتدي بإيه اللي الجامعة او معاهد زي ITI او اي Bootcamp بيوفرهولك؟

• دكتور ومعيد يشرحوا لك ويمتحنوك ويصححوا لك الإمتحانات.
• طلاب بتساعدوا بعض في الشرح وحل المسائل او حاجات تانية كتير.
• مواد حصرية ومترتبة؛ شهادة اتمام الدراسة؛ فقط لا غير.

طيب يفرقوا ايه عن كورسات الجامعات الأونلاين؟

• كورسات جامعات برا وخاصة امريكا تصنف "الأحسن" ودكتور المادة غالباً من صفوة مجاله. ولكن الحقيقة مينفعش نقارن مصر -اللي مفهاش تعليم (بشهادة دكاترة)- بأمريكا... بلد التعليم العالي. لو متعرفش مين امريكا، فالفرق بينها وبين اي دولة تاني كبير جداً.
• جايز الكورس الإنت بتاخده يكون بيدي شهادة. (بغض النظر ان الشهادات مش مهمة في مجالنا)
• في Online grader يصحح لك بدل المعيد؛ وفي forum تسأل فيه ويتشرح لك بدل المعيد.
• في امتحان في اخر الكورس زي الجامعة.

ايه الفرق الجوهري بين AC و الباقية؟

1. هتذاكر احسن كورس في كل مادة بدون ما تعيد اختراع العجلة وتقارن بين الكورسات في كل مرة عايز تدرس كورس جديد. ده لأن مفيش حاجة اسمها جامعة فيها احسن كورس في كل المواد ولكن انت بتاخد احسن كورس من كل جامعة. (متنساش انك متقدرش تضمن ان اي جامعة/معهد هيقدم كل الكورسات بشكل كويس، جايز بعض المواد تبقي وحشة)
2. مفيش اي مصاريف محتاج تدفعها وﻻ هيبقي عليك التزامات مالية. مش محتاج تقدم علي حاجة وﻻ تستني قبول وجو "لو فشلت تقدم السنة الجاية".
3. هتلاقي ناس بتدرس نفس الكورس بتاعك فيه وتقدر تذاكر معاهم او تذاكر At your own pace بنائاً علي الفايدته اكبر عليك. (فايدة المذاكرة مع الناس في نقطة 4)
4. شهادة الكورسات مينفعش تقدم بيها لحاجة اكاديمية عشان تاخد ماجيستير مثلاً (بإستثناء بعض الكورسات اللي ينفع تُحتسب كcredit hours).
5. ممكن تتوقف عن المذاكرة لو انت شخص كسول وبتلعب كتير لأن مفيش حاجة تخسرها (لا هتدفع فلوس summer course وﻻ مصاريف سنة جاية).
6. هتوفر وقت (تقريباً 4 ل 6 ساعات واللي تقريباً بتساوي ربع يومك) لأنك مش محتاج تضيع ساعتين -او اكثر- مواصلات وترجع تنام اول ما ترجع بسبب التعب (ساعتين علي الأقل وانا متأكد انها اكتر كمان).
7. واخيراً، أهم نقطة (وده السبب الخلاني اسيبها للأخر) وهي فايدة الطلاب اللي تتلخص في "الإرشاد المتبادل". (شرح كل الكلام بالتفصيل في سكشن "Mutual Mentoring")

Mutual Mentoring

• انت ممكن تذاكر كورس اونلاين لوحدك. بس كام مرة وقفت قدام حاجة بالأيام كنت ممكن تسألها لحد ويخلصها لك في 5 د؟ عارف محتاج جهد ووقت قد ايه عشان تختار احسن كورس (من بين كل الكورسات العلي النت) للمادة الإنت عايزها؟ متخيل تعمل ده في كل مادة هتدرسها؟
• الإرشاد المتبادل بين الطلاب يتمثل في:
  1. محدش يقعد في سؤال بالأيام (ده علي اعتبار انك هتوصل لأحسن إجابة او هتوصل اصلاً وانت بتدور مع نفسك) وهتلاقي ناس تجاوبك حتي لو مش معاك في الكورس ولكنهم درسوها قبلك.
  2. الشخص البيشرح هيفهم اكتر لما يشرح.
  3. الحصول علي افضل الترشيحات ودايما Pinned في الrelative category (مثلاً ممكن تطلب كورس لمادة وتلاقي اليوفر عليك التعب ويقولك رأيه عن تجربة، هيبقي في اكتر من حد بيفكر وبيجيب من مصادر مختلفة وكورسات وبالتبعية ده هيخليك احسن لأنك هتبقي متطلع علي efforts اكتر من شخص).
  4. هتتجنب اخطأ الناس القبلك لأنك هتقدر تطلع علي ارائهم بخصوص كورس او منهجية مذاكرة.
  5. هتوصل ناس ببعض مستحيل كانوا يوصلوا ببعض لولا السيرفر.
  6. زيادة الإلتزام لأن الشخص هيبقي مضطر يخلص في نفس توقيت زمايلة.
  7. تلاقي حد بيرشدك لحاجات خارج الكورسات الهتدرسها زي تتعلم تكنولوجي ايه ومنين وليه الخ. غالباً انت مش مبدع كفاية لدرجة انك تسأل سؤال محدش سأله قبلك ولكنك بس مبتعرفش تدور؛ ولكن لما هتسأل في الجروب، ففرصة انك تلاقي إجابة من طالب شبهك هتبقي أعلي.
  8. في المستقبل، هتلاقي الطلاب دول اشتغلوا في اماكن كتيرة كبيرة ومسيرك تحتاج حاجة وتلاقي حد يساعدك منهم.
  9. (نقطة مش هتفرق مع كل الناس ولكن) دراسة الساينس/الأساس بياخد ما ﻻ يقل عن 6 شهور وﻻ يزيد عن سنتين (كلام مشرف) او متوسط 15 شهر (كلام د. مصطفي سعد). بنتكلم 6 شهور -كحد ادني- بتذاكر لوحدك وممكن تمل وتبطل مذاكرة؛ ده مش هيحصل بسبب السيرفر.

اسئلة شائعة

طيب، انا بالفعل في جامعة وعندي كل ده، اخش AC ليه؟

• الحاجات مش زي بعضها، يعني اغلب دكاترتك ميجوش حاجة جنب دكاترة IV-League؛ معظم زمايلك في الجامعة مبيذاكروش وبيتدلعوا لأنهم مش مستهدفين شركات كبيرة وأغلبهم هيشتغل اي حاجة وخلاص؛ انما في AC، الناس طموحة وعايزة تشتغل في FAANG ويهاجروا ويبقوا Top في مجالهم؛ وبالتبعية، عندهم إلتزام ذاتي لأنهم بيذاكروا حاجات صعبة بدون ما يحتاجوا حد يجبرهم علي المذاكرة. الموضوع مش Binary بحيث "عندي الأنت بتقدمه اسماً، فمش محتاج السيرفر".
• بنائاً عليه، فأنت احسن حاجة تعملها هو انك تشوف ايه المواد العندك في الجامعة وتذاكرها من برا بحيث تخلي الإثنين بيخدموا علي بعض.

طب في بالفعل سيرفرات شبه السيرفر ده، فرق ايه عنهم؟

• ﻻ شبهه اسماً... زي نقطة 4؛ احسن واحد فيهم اخره بيقدم لك شانل لكل كورس وبيرشح لك كورس واحد بس. الكورسات والشنلات كلها unsupervised، حرفياً الكورسات مترشحة supervisionally بس (ومكتوب كدا عليها) ومش متقارن بينها وبين غيرها. وتقريباً كل الناس العليه anonymous وبتلاقي 1/1000 -ان مكانش اقل (وحرفياً ممكن 1/3000 ودي ارقام فعلية)- البيجاوبوا (ده لو لقيت اجابة) والإجابة مبتبقاش دايماً كويسة لأن هو شخص وهمي (متعرفش his credentials) بيكلم شخص وهمي زيه... الناس مش معروفة لبعض عشان ت Hold accountable for wrong advice. ممكن ادي امثلة لو حد طلب بس بخلي الموضوع موجز.

ازاي استفاد من السيرفر بأحسن طريقة ممكنة؟

• شوف: https://youtu.be/v1SyedPG0jw

انا خريج ومش عارف اذاكر ايه او ابتدي منين؟

• شوف channel faq في السيرفر.
• متمشيش غير ورا واحد بس.
• مش اي حد تسأله او تاخد منه نصيحة.

ليه اذاكر من MOOCs بدل اي حاجة جنبي او الجامعة وليه هي حاجة اجبارية وحرجة؟

• عشان منهج جامعتك مستحيل يأهلك للشغل في المجال ده.
• عشان لو حبيت تشتغل بمرتب محترم، محتاج كورسات محترمة للأسف اغلبها اجنبي.
• ولو جربت الكورسات الأجنبية هتعرف انك مش هتلاقي اليجاوبك بشكل سريع وبشكل عملي (اخره ٣ سطور في ال discussion forum) ومش كل حاجة ستاك وجوجل هيساعدوك فيها. (هتعرف بالتجربة)
• فهتلاقي انك، عشان تحل معضلة الاسئلة، محتاج حاجة من ال٣، تروح تدرس من اول تاني في جامعة برا، او تاخد كورسات بمبالغ محترمة علي النت، او تخش AC.

---